我有我有﹗

我有我有﹗

旅旅唔好意思選中我寫五大怪癖。被維園阿佰認為“又又，公主快寫啊，你應有大把！:P”
想到頭爆﹐原來﹐我真的有一籮筐怪癖﹕愛自言自語﹑個人式無主見﹑想故事睡﹑連續發夢﹑疑神疑鬼﹑係街唔講電話﹑鍾意寫信﹑著衫有主題﹑24小時襪不離身﹑愛買鞋﹑愛拾荒﹑說話跳到飛起…也有旅旅的強烈手汗和突然突兀地紅或綠…

說五個﹕

1. 著衫要有主題﹐衫褲鞋襪要一SET。每季會先畫低自己想要既套裝﹑同埋設定一個主題氣氛或感覺才去買衫。如此一來﹐那一件衫只能襯那一條褲。還有﹐會無啦啦心血來潮著怪衫出街或者係屋企周圍走。

2. 疑神疑鬼﹐季子跟縱我。從中三開始﹐睇中既野成日轉個頭就比人買左。搞到我成日要re-order (上星期五﹐行一個街就留左一次deposit同一個電話) 。所以我認為﹐一定有個人跟縱我。以後逢行街買野﹐我只會蚊滋咁細聲話比朋友仔知(又或者好隱悔地講) 我想買咩。

3. 24小時襪不離身 + 愛買鞋。我對自己隻腳有情意結﹐又細到大﹐無論是春夏秋冬﹐抑或是睛天陰天雨天﹐室外室內﹐也一定要/想著襪。無襪著﹐就一定要著鞋﹔就算有鞋著著﹐都會好唔自然。另外﹐數年間﹐家中已有一打鞋。

4. 說話跳到飛起 + 友人們說我好像一分鐘不說話會死似的。說話跳到飛起﹐就是我能神速轉話題或追問我想問的事﹐還有說的話不跟logic, 跳得很快。最近被發現的例子是講開大自然﹐接著我說類似“咁咪好多牛/ 牛牛好可愛”。
(註﹕我的思路是﹐“大自然à花花草草à 草à草地à牛食草 à 好多牛食草à牛牛會叫à好可愛”不過﹐我只說了最後一句。)

5. 怪笑。好多人都唔鍾意同我睇戲﹐尤其愛情片。因為當個個人喊曬口既時候﹐我會係道大笑。至於恐怖片﹐多數人都會係隻鬼彈出黎﹐音響抨鈴啪爛先至叫﹔而我﹐會係人地緊張到就叫既時候叫﹐成日反嚇到人。加多一樣好頂癮既係﹐每逢青青純純少男少女陶醉於男女主角表白接吻鏡頭﹐我都會發出尖尖的“嘰---嘰----”笑聲和尖叫﹐大煞風景。

欽點五人﹕
Rachel姐
小婷婷
史洛比吻
小霧
司南

遊戲規則: http://jaffe.bloggerism.com/archives/003236.html